जनगणनेच्या प्रक्रियेची जबाबदारी अचूकपणे पार पाडावी

जिल्हाधिकारी वान्मती सी यांच्या अधिकारी व कर्मचाऱ्यांना सूचना

जिल्हाधिकारी कार्यालयात जनगणना २०२७ अनुषंगाने तीन दिवसीय प्रशिक्षण कार्यशाळेचे आयोजन करण्यात आले होते. कार्यशाळेच्या उद्घाटनप्रसंगी त्यांनी सूचना केल्या. निवासी उपजिल्हाधिकारी संजीव जाधवर, जनगणना संचालनालयाचे संयुक्त संचालक कविता गोडबोले, सांख्यिकी अधिकारी प्रणय कडुकर तसेच जिल्हा समन्वयक मुकेश गोंडाणे उपस्थित होते. जिल्ह्यातील सर्व प्रभारी अधिकारी तहसीलदार व मुख्याधिकारी तसेच उपविभागीय अधिकारी आर्वी विश्वास शिरसाठ, उपविभागीय अधिकारी हिंगणघाट आकाश अवतारे, अधीक्षक अनिकेत सोनवणे, नायब तहसीलदार धनंजय वाघ, सहायक महसूल अधिकारी अमोल उगेवार, महसूल सहायक नितीन मडावी यांच्यासह विविध विभागाचे अधिकारी, कर्मचारी उपस्थित होते.

निवासी उपजिल्हाधिकारी संजीव जाधवर यांनी सांगितले की, जनगणना दोन टप्प्यांत होणार आहे. पहिल्या टप्प्यात घरयादी व गणना तर दुसऱ्या टप्प्यात लोकसंख्या गणना केली जाईल. १६ मे ते १५ जून २०२६ या कालावधीत प्रगणक घरभेटी देऊन माहिती संकलित करतील. यापूर्वी १ मे ते १५ मे २०२६ या कालावधीत नागरिकांना स्व-गणना करण्याची सुविधा उपलब्ध असणार असून, मोबाईलच्या माध्यमातून संकेतस्थळावर माहिती भरता येणार आहे. डिजिटल तंत्रज्ञानाच्या साहाय्याने होणाऱ्या या जनगणनेत नागरिकांनी अचूक माहिती देऊन सहकार्य करावे, असे आवाहन प्रशासनाने केले आहे.

यावेळी जनगणना संचालनालयाचे संयुक्त संचालक कविता गोडबोले, सांख्यिकी अधिकारी प्रणय कडुकर तसेच जिल्हा समन्वयक मुकेश गोंडाणे यांनी जनगणनेची पार्श्वभूमी, प्रक्रिया व संकल्पना याबाबत सविस्तर मार्गदर्शन केले. कार्यशाळेत जनगणना प्रक्रियेचा पाया, अधिकारी-कर्मचाऱ्यांची भूमिका, तसेच पहिल्या टप्प्यातील घरयादी व ३४ मुद्द्यांवरील माहिती संकलन याबाबत प्रश्नोत्तरांच्या माध्यमातून प्रशिक्षण देण्यात आले. सदर प्रशिक्षण १८ प्रभारी अधिकारी सहभागी झाले होते. त्यात ८ तहसीलदार व ९ मुख्याधिकारी तसेच १८ स्तरीय लिपीक व १८ टेक्नीकल असिस्टंट यांचा समावेश होता.