प्रतिनिधी / दै.प्रतापगडचे वारे वर्धा : एव्होनिथ स्टीलच्या ‘रन फॉर एन्व्हायरन्मेंट २०२६’चे आयोजन केले. पर्यावरण संरक्षण आणि चांगल्या सार्वजनिक आरोग्याबाबत जनजागृती करण्याचा हा उपक्रम राबविण्यात आला. अधिकाधिक लोकांचा सहभाग मिळावा यासाठी ही मॅरेथॉन १० किमी आणि ५ किमी अशा दोन अंतरांत घेण्यात आली.
मॅरेथॉनच्या शुभारंभाला प्रमुख पाहुणे राज्यमंत्री डॉ. पंकज भोयर, माजी राज्यमंत्री रणजीत कांबळे, नगराध्यक्ष सुधीर पांगुळ, पोलीस अधीक्षक सौरभ अग्रवाल उपस्थित होते.
वर्धा शहरातील विविध मार्गांवर ही मॅरेथॉन पार पडली. तीन वेगवेगळ्या वयोगटांसाठी स्वतंत्र स्पर्धा ठेवण्यात आल्या होत्या. या मॅरेथॉनमध्ये १६ वर्षांवरील ३,००० हून अधिक नागरिकांनी सहभाग घेतला. रोजच्या छोट्या छोट्या सवयींमधून आपला पर्यावरणावर होणारा परिणाम कसा कमी करता येईल, याबाबत जागरूकता निर्माण करण्याच्या उद्देशाला सहभागी धावपटूंनी पाठिंबा दिला.
१० किमी आणि ५ किमी या दोन्हीसाठी तीन वेगवेगळ्या वयोगटांमध्ये रोख बक्षिसे आणि पदके देण्यात आली. तसेच, सर्व नोंदणीकृत सहभागी धावपटूंना सहभागाबद्दल गुणवत्ता पत्र प्रदान करण्यात आले.
